ليش ما حدا بشتري منتجك؟

المشكلة مش إنو ما في ناس مهتمة،
المشكلة إنك مش قادر تحكيلهم ليش لازم يهتموا.

أغلب مؤسسي SaaS بيبدأوا من الكود، من الفيتشر، من اللوحة، من الباكند.

بس الزبون مش بشتري لوحة.
بشتري قيمة.

القيمة مش إنو عندك ٣ شاشات حلوة.
القيمة إنك وفرت عليه ٣ ساعات بالشهر، أو ريّحتله دماغه من إشي بيكرهه، أو حسّيته إنو أذكى من غيره.

شو يعني Value Proposition؟

هي الجملة اللي بتجاوب على سؤال:
"ليش أشتري منك أنا؟"

إذا ما قدرت تحكيها بثقة، وبلغة الزبون، وبدون لف،
ما حدا رح يدفعلك.

الغلط الشائع:

أغلب الرياديين بيوصفوا المنتج.
ما بوصفوا أثره.

🚫 "منصتنا بتوفر أدوات ذكية لإدارة المهام الجماعية باستخدام الذكاء الاصطناعي."

✅ "خلّي فريقك يخلّص شغله بـ 30٪ وقت أقل… بدون شكاوي ولا تخبيص."

كيف تصيغ Value Proposition صح؟

1. احكي إيش المشكلة اللي بتحلّها.
2. وضّح لمين بتحكي (الفئة المستهدفة).
3. احكي شو بصير بحياته بعد ما يستخدمك.
4. احذف كل كلمة مش بتخدم هدف البيع.

مثال بسيط:

بدل ما تقول:

"بنوفر أداة لإدارة الحجوزات مع تنبيهات وتذكير تلقائي."

قول:

"وفّر وقتك وخلّي عملاءك يلتزموا بمواعيدهم… بدون ما ترفع سماعة تذكّرهم."

خلاصة

إذا ما عرفت تحكي قيمة منتجك بكلمة،
لا تتوقع الزبون يعرف لحاله.

ابدأ من القيمة، مش من الكود.
وابني كل إشي حواليها.